السلام عليكم جميعا اشكر جميع من جاوب على استفساراتي في هذا القروب والان ب انقل لكم تجربتي بعد انتهاء رحلتنا في موريشيوس اولا حجزنا عن طريق مكتب سياحي اكتشف العالم والاستاذ وليد ما قصر معانا صراحة بشرحه للمنتجعات وبعد البحث والمقارنة اخذنا منتجعات رائعه باسعار رائعه + شرايح انترنت مفتوح + استقبال من المطار ب لافته باسمائنا وسائق شخصي وسيارة يوميا تحت امرك. رحلتنا كانت عبارة عن ٧ ايام تقريبا قررنا فيها انه نحجز منتجعين فقط واحد بالشرق والثاني بالجنوب الغربي تجنبت الشمال عن قصد لانها احر وشواطئها صخريه المنتجعات اللي اخذتها الاول في الشرق لوكس بيل مار Lux bell mare والثاني في الجنوب الغربي للجزيرة سانت ريجيس / جي دبليو ماريوت The St. Regis / JW Marriott اول اربع ايام في بيل مار المنتجع فخم راقي جميل كل زاوية في اجمل من الزاوية الثانية كل مكان ينفع للتصوير خدمتهم ممتازة حجزنا كان هاف بورد فطور وعشاء المطعم الرئيسي بوفيه رائع ومميز جدا ومتنوع وجربنا المطعم الايطالي مره لذيذ باقي المطاعم مو مشمولة في الهاف بورد المسبح ممتاز وكبير والشاطئ خرافي بصراحة من اجمل الشواطئ اللي سبحت فيها بحياتي ناعم جدا وجميل فعاليات البحر المجانية متوفرة ايضا نجي للسلبيات اولا منطقة الشرق معرضه للهواء بشكل كبييييير وبعض ايامنا كان الهواء قوي مره مره ومرات يوصل لشكل مزعج غير قابل للتحمل كيدز كلوب مو سيء بس يستقبل من ٣ سنوات وطالع ورفضو دخولي مع طفلي فيه العاب خارجيه فقط لعبنا فيها النظافة كويسة بس مو ذاك الزود صراحة يعني على فخامة المكان الا ان مستوى النظافة مقارنه شوي ضعيف الفعاليات كلها نهاريه ومن يجي الليل بصراحة فيه هدوء بزيادة في المكان والانوار ضعيفة جدا ومافي اي فعاليات سوى الاسترخاء والعشاء ف شوي نمل بالليل بعدها انتقلنا لمنتجعنا الثاني سانت ريجيس كبير وحديث وفخم جدا قولف كارز بكل مكان المكان حي اكثر بكثييير وممتع وفيه فعاليات كل ثلاثاء يسوون بارتي وفيه الرقصة الموريشيوسيه واحيانا يجيبون لوكال براندز ويفتحون زي الميني بازار حجزنا برضو هاف بورد فيه ٥ مطاعم كلها مشموله باستثناء الياباني المطعم الرئيسي جيد لكن مو بمستوى لوكس بيل مار وبعدها جربنا الهندي والتركي وكانو جدا لذيذات الهواء اهدى بكثير فيه ثلاث مسابح بمناطق مختلفة الكيدز كلوب رااائع والعاملات فيه ممتازات جدا ولطيفات وفيه مسبح خاص بالاطفال مع نظام تدفئة فيه غرفة العاب للمراهقين ممتعه جدا فيها سوني وبي سي وكل العاب البورد قيمز فيه سينما ممتاز جدا يمديك تدخل وقت العروض وايضا الوقت اللي بينهم وتختار فلم بنفسك كلها مجاني وحتى لما سوينا تشيك اوت وقبل وقت طيارتنا جلسنا هناك ٤ ساعات ومريح المكان جدا وفيه غرف شاور وتغيير وايضا فعاليات البحر المجانية نفس الشي موجودة. السلبيات من وجهة نظري الشاطئ جميل جدا *خصوصا وقت الغروب للتصوير* لكن يعيبه الصخور شوي تحتاج جدا الى شوز البحر عشان ما تتجرح اقدامك نجي للفعاليات اللي برا المنتجعات حنا كنا غالبا مارح نطلع من المنتجعات لكن طلعنا ٣ مرات ١- جزيرة الغزلان وكانت تجربة رائعه جدا وممتعه خصوصا الجو كان جدا جميل ذاك اليوم وطلبنا من منتجعنا لوكس بيل مار انه نسوي السنوركلنق المجاني هناك ووافقو ٢- العاصمة بورت لويس وكودان ووترفرونت بصراحة كنت رايحة بتوقعات منخفضة جدا بس قلت حسافة نرجع ماشفنا العاصمه بس تفاجئنا ان المكان جدا ممتع ومليان اشياء وتذكارات وهدايا وملابس لينن والإسعار رخيصه ٣- كاسيلا بارك بحكم ان معنا طفل يعشق الحيوانات قررت اروح بالرغم من السب الكثير اللي قريته في القروب ولكن كان المكان ممتع جدا والتمشي فيه منعش ورائع السلبيه الوحيده الحيوانات شوي قليله ومتكررة يعني مافيه انواع كثيره لكنها تجربة جميله بصراحة. كلمت كل المنتجعين وسألتهم عن بكجات التصوير وكانت الاسعار مرتفعة ولا يضمنون لك وجود مصورة انثى للمحجبات فتواصلت مع مصورة لوكال جتني في سانت ريجيس لان التصوير في شاطئهم مع الجبل جميل جدا وكان السعر رائع مقارنه بكمية الصور اللي راح نحصل عليها نفسيتها تجنن ولطيفة مره وورتني شوي من الصور واضح حلوه جلست معنا ساعه ونص وبتعطينا ٦٠ صورة معدلة + جميع الصور اللي صورتها هنا حسابها انستقرام للي يبغاها [https://www.instagram.com/coralielesurphotography?igsh=bm1jNmp1bHc0NWM0](https://www.instagram.com/coralielesurphotography?igsh=bm1jNmp1bHc0NWM0) بشكل عام الدولة جميلة جدا ولكن يعيبها بالنسبة لي هو بعد المشاوير اي مشوار افكر اطلع اقل شي بياخذ مني ساعه لين الوصول للوجهه + شوارعهم سيئه جدا وتدوخ كلها لفات.