**اهلاً وسهلاً ** الحمدلله أنا رجعت بالسلامة قضيت ٨ ايام في موريشوس اشوف انها كافيه وزياده يعني باليوم الثامن قلت ياليتني رجعت امس . شكراً للجميع و حبيت انقل لكم تجربتي بالتفصيل لاني احب لما اروح مكان جديد اشوف تجارب الناس بالتفصيل أنا خططت و حجزت كل شي بعدين للأسف لقيت القروب علماً اني من زمان ادور قروب موريشوس ف اقتراح لو يتغير اسم القروب إلى موريشوس او السياحة في موريشوس بدون أعلام ومسافات حتى يسهل الوصول للمجموعة لانها ثرية بالمعلومات بالنسبة لي سكنت ب انانتارا و سيي دايموند الاثنين حلوين مرتبين نظاف .. وفيهم شطافات الحمدلله مافيهم حشرات الاثنين .. بس بالمقابل لاحظت ب الفندق الثاني يوم طلعت الشمس كان فيه زي النمل الطائر بس ما ازعجني لانه ماكان يجي عندي بس كنت اشوفه على الطاولات انانتارا البحر حقهم خطير و غير مناسب ابداً للسباحه لان فجأه وانت تسبح وتمشي بالبحر يكون فيه منحدر فجأه عميق جداً ومو حاطين له حدود عندهم فعاليات مجانيّة يوقا و مشي وقت الغروب و غوص المشي وقت الغروب مع تور قايد من نفس الفندق مررره ممتع يخليك تتمشى بالمنطقه كامله و يمشيك داخل غابة ( اللي بيجربها لازم يبخ بخاخ الحشرات عشان اذا مشيتو بالغابه في ناموس ) وعندهم جم ٢٤ ساعه مفتوح وغرفة العاب وبلاي ستيشن و كيرم و العاب ثانيه ويسوون فقرة كاريوكي المغرب بغرفة الالعاب و عندهم ثلاث مطاعم واحد عالمي بوفيه و واحد بحري وواحد هندي الاثنين بحجوزات ومو كل المنيو مجاني اللي مو مجاني مكتوب جنبه سعره والمشروبات غير شامله . الهندي ابداً ما اعجبني البحري زين و العالمي عادي تعاملهم لطيف ودويين وخدومين ويعرفون انقلش كلهم تقريباً وعندهم موظفين عرب وفيه مسبحين جربت المساج عندهم ما اعجبني و اقل احترافيه ( المساج يوم رحت احجز قالو فل قلت بكره قالو فل وكذا لين قلت لهم ضروري أنا ابي مساج قالو خلاص اوكي تعالي بكره) ف اعتقد لازم تلزمون عليهم. كل يوم لكل غرفة قارورتين ماء كبيرة .. وكانو بالليل يحطون ثنتين زياده — See diamond اعتبره ارقى بمراحل مع اني من عشاق انانتارا ولكنه تفوق عليه معاملتهم رهيييييبه ودويين جداً وخدومين مشكلتهم مايعرفون انقلش يمكن بالفندق كله بس اثنين يعرفون و يدبرون انفسهم الباقيين . عندهم مطعم شامل بالوجبات يقدم اطباق متنوعه لحم ودجاج وخضار و بحريات طريقة تقديمه رهيبه وعندهم بوفيه يوم بالاسبوع و يقولون لك بالليل تعال المطعم كاشخ او البس شوز بالنسبة للرجال ( بس الناس تجي مرتبه وحتى لو ما التزمت مايقولون لك شي بس مطعهم انطباعه هادي ورايق ) الشاطيء حقه مرتب ونظيف ورملي و مناسب للسباحه عندهم فعاليات مجانية .. اللي هي الكاياك و الواتر بورد و عندهم قارب اللي شخصين يجدفون فيه كلها مجانيه عندهم كل يوم من ٤ إلى ٥ مشروبات مجانية وخفايف كيك و كوكيز و دانيش و فطائر وميني سمبوسه ( كل يوم نوع سمبوسه ) و عندهم بعض الايام بالاستقبال Happy hours مشروب والثاني مجاني المنتجع الثاني راااايق وحق هدوء واسترخاء فعلياً جربت المساج عندهم ممتاز ولطيفين و محترفين للمعلوميه : عندهم رويال سويت فيه مسبح خاص ( يغم القلب وصغير بس اللي يميزه انه فيه مسبح خاص، والمسبح كذلك صغير ما أشوفه يسوى) احسن شي عندهم الجينور سويت يشرح الصدر فيه بلكونه وكبير . هذا كل شي بالنسبة للفنادق . نصيحة اي احد يسافر لأي جزيرة : ياخذ معاه بخاخ الحشرات واذا فتح شنطته يبخها من فوق و كذلك من الاطراف عشان مايدخل بالشنطه شي ولا بالملابس لو دخل الغرفه حشرات او نمل طائر - الكبس طارد الحشرات ( تشبكونه بالغرفه اول ما توصلون) - و جزمة البحر .