**السلام عليكم.** بشارككم تفاصيل رحلتي مع الاسعار. رحلتي لموريشيوس من ١٨ مارس الى ٢٩ مارس. رحلتنا شبابية شخصين اليوم الاول: الوصول الى الفندق شراء سناكات من سوبر ماركت اليوم الثاني: كنا صايمين ورحنا الظهر وخليناه مولات وشوبنق. اليوم الثالث: مطل كابتن ماثيو + شلالات شماريل والالوان السبعة. مطل كابتن ماثيو حلو حق تصوير وكذا. تذكرة دخول شماريل ب 120 ريال لشخصين وفيه مقهى فوق رهيب. اليوم الرابع: فعاليات بحرية + رحلة بحرية لجزيرة الغزلان ايل و سيرف سوينا الفعاليات برى الجزيرة عند Aqua Sea تقريباً 850 ريال مع الصور تجي في USB. اخذنا: Tube Ride زي الدونات ويسحبك قارب. Parasailing باراشوت ويسحبك قارب. Undersea walk تمشي تحت البحر وحولك سمك. بعدها رحنا رحلة بحرية لشلال ولجزيرة الغزلان. حجزنا قارب خاص سريع ب 722 ريال بدون غداء انصحكم تجون بدري واذا حابين تسبحون يمديكم فيه منطقة في البحر آمنه جيبوا معكم مناشف و فرشة صغيره وسناكات اذا بتطولون لانه صاحب القارب يعطيكم وقت ترجعون فيه. اليوم الخامس: حديقة كاسيلا خفيفه لطيفة ومناسبة للأطفال فيها حيوانات وطيور وكمان فيها سفاري تمشي الحال جيبوا معكم مظلة اذا كانت الشمس حارة حقت جدول ٣ ساعات كذا. اليوم السادس: حديقة المغامرات لافالي اخذنا البكج البلاتيني 1900 ريال بدون المطعم. يشمل: ١١ زيب لاين ودبابات وسيارة السباق والجسر و المطل حقهم قو برو لتصوير جميع الفعاليات. واحنا طالعين صورونا صور بس عشان تاخذهم لازم تدفع على حسب الفعاليات فيه احنا اخذنا كل الفعاليات ب 180 ريال تصويرهم احترافي. المكان جميل جلسنا فيه ٥ ساعات غالبية العاملين هناك مسلمين وعندهم مصلى نظيف. وفيه مقهى عندهم قهوة ومشروبات. انصحكم بموهيتو الباشن فروت. اليوم السابع: السوق الشعبي + umbrella square + قلعة سيتاديل umbrella square منطقة رايقه فيها ماركات ومحلات ومطاعم وفيها مطعم هندي نيبالي اسمه ناماستي ما جربته بس عليه مدح. السوق الشعبي في منطقة كودان قريب الامبريلا سكوير [https://maps.app.goo.gl/9bkEER5EKvp416jEA?g_st=ic](https://maps.app.goo.gl/9bkEER5EKvp416jEA?g_st=ic) مره حلو للهدايا التذكارية. قلعة سيتاديل حلوة للتصوير وكذا كان حصن زمان ايام الاستعمار البريطاني حقت ٢٠ دقيقة قريبة من السوق الشعبي. اليوم الثامن: مصنع السكر حلو بس ما دخلته على طول رحت للبوتيك حقهم اشتري هدايا سكر و مربى. انصحكم بمربى الجوافة الصينية. اليوم التاسع: مصنع الشاي + ركوب الخيول كان الدخول مجاني لاننا ساكنين في الفقاعة وكان السكن موفر زيارة مجانية للمصنع وكمان تذوق الشاي مجاني. اليوم العاشر حتى الثاني عشر: قضيت ال٣ ايام في المنتجع وما طلعت منه الى موقع رحلتي. السكن: جربت فنادق ومنتجعات كثيره وتعمدت انها تكون موزعة في انحاء الجزيرة وتعمدت آخر سكن يكون قريب من المطار تحسباً اذا صار شي. السكن الاول: **EvaZion** موقعه في الشرق مطل على Grand River South East نظيف ولطيف ومطل على النهر. تحس انك جاي عند اقاربك من طيبة العجايز اللي يقدمون الفطور 😂. عندهم الكاياك على النهر مجاني. السكن الثاني: **Domaine de Grand Baie** موقعه في الشمال في منطقة جراند باي. موقعه مميز قريب من مولين واحد صغير وواحد كبير. اغلب الاماكن تبعد ٤٠د الى ساعة. السكن الثالث: **Bubble Lodge Bois Chéri** عبارة عن فقاعة هواء وسط اشجار وحول حقول الشاي حولك حيوانات و طيور تجربة جميييلة انصحكم تجون على وقت الدخول عشان تلحقون الغروب وتشوفون الغزلان والخنازير. المكان بعيد عن المحلات فخذوا معكم سناكات والاكل في المطعم هناك تعبان. السكن الرابع: **Preskil Island Resort** رهيب الشاطىء هناك نظيف حق سباحة المنتجع مكمل وفيه كل شي المساج هناك حول ٢٠٠ ريال. الاكل في البوفيه هناك لذيذ ومتنوع. المطاعم اللي تحتاج حجز مخيسه ولا تستاهل. هناك المشروبات حتى الماء غير مجانية اي شي تشربه احسبه في الملاحظات عندك لان عندهم لخبطة في الحساب. المصروفات: التذاكر كلفت حولي ٦٠٠٠ ريال للشخصين السكن ٨٠٠٠ ريال الفعاليات حوالي ٦٥٠٠ ريال الاكل والشرب والمقاهي والتسوق حوالي ٧٠٠٠ ريال السواق حوالي ٢١٠٠ ريال الاجمالي ٢٩ ألف تقريباً. السواق: سواقنا كان اسمه كمال كويس جداً ومنتظم على الوقت ونصوح سيارته نظيفة. كل مره يجي سواق مختلف (اخوه وعيال اخوه) كلهم محترمين. رقمه +23057937247